O‘zbekistonda 2030-yilgacha beshta yangi sel-suv ombori quriladi
Loyiha sel va toshqin suvlaridan samarali foydalanish, sug‘oriladigan yerlarning suv ta’minotini yaxshilash hamda yangi yer maydonlarini o‘zlashtirishga xizmat qiladi.
O‘zbekistonda 2027–2030-yillarda Jizzax, Samarqand va Toshkent viloyatlarida beshta yangi sel-suv ombori barpo etiladi. Bu haqda Prezidentning “Sel-toshqin suvlaridan samarali foydalanishni ta’minlash chora-tadbirlari to‘g‘risida”gi qarorida belgilangan.
Qarorga ko‘ra, Jizzax viloyatining Baxmal tumanida Tangatopdisoy, Samarqand viloyatining Urgut tumanida G‘ijduvonsoy va Choshtepasoy, Qo‘shrabot tumanida Oqtepasoy hamda Toshkent viloyatining Bo‘stonliq tumanida Oqsoqotasoy sel-suv omborlari barpo etiladi.
Yangi omborlar ishga tushirilishi natijasida Samarqand viloyatida 7 ming gektar, Toshkent viloyatida 2 ming gektar va Jizzax viloyatida 300 gektar yerning suv ta’minoti yaxshilanadi.
Shuningdek, Samarqand viloyatida 3,3 ming gektar va Toshkent viloyatida 300 gektar yangi yer maydonlarini o‘zlashtirish imkoniyati yaratiladi.
Respublika bo‘ylab kichik suv zaxiralarini shakllantirish imkoniyati mavjud bo‘lgan 60 ta hudud aniqlangan. Sel-suv omborlarini qurish orqali bahor-yoz mavsumida yuzaga keladigan sel va toshqin suvlarini to‘plash, qishloq xo‘jaligi mahsulotlari yetishtirish hajmini oshirish hamda yangi ish o‘rinlari yaratish ko‘zda tutilgan.
Qaror bilan ayrim loyihalarni davlat-xususiy sheriklik asosida amalga oshirish ham belgilangan. Xususan, Jizzax viloyatidagi Tangatopdisoy va Toshkent viloyatidagi Oqsoqotasoy sel-suv omborlari qurilishiga xususiy investorlar jalb etiladi.
Bundan tashqari, sel-suv omborlari hududlarida turistik-rekreatsion zonalar va baliqchilik xo‘jaliklarini tashkil etishga ruxsat beriladi. Ular uchun zarur tashqi muhandislik-kommunikatsiya infratuzilmasini yaratish ishlari davlat byudjeti hisobidan moliyalashtiriladi.
