Abduqodir Xusanov Osiyoning eng qimmat futbolchisiga aylandi
Uning transfer qiymati 15 million yevroga oshib, 50 million yevroga yetdi.
O‘zbekiston milliy terma jamoasi himoyachisi Abduqodir Xusanovning transfer qiymati 50 million yevroga yetdi. Bu haqda Transfermarkt portali tomonidan Angliya Premyer-ligasi futbolchilari bozor qiymatlari yangilanganidan so‘ng ma’lum qilindi.
Yangilangan ma’lumotlarga ko‘ra, “Manchester Siti” klubida to‘p surayotgan 22 yoshli futbolchining transfer bahosi 15 million yevroga oshgan. Avval uning qiymati 35 million yevroni tashkil etgan.
Ushbu ko‘rsatkich natijasida Abduqodir Xusanov Osiyoning eng qimmat futbolchisiga aylandi. U reytingda yaponiyalik futbolchilar Kaishu Sano va Takefusa Kuboni ortda qoldirgan.
Shuningdek, u Angliya Premyer-ligasida to‘p surayotgan sobiq ittifoq mamlakatlari futbolchilari orasida ham eng yuqori transfer qiymatiga ega futbolchi sifatida qayd etilgan. Ushbu ro‘yxatda ikkinchi o‘rinni ukrainalik Yegor Yarmolyuk egallagan.
