Surxondaryoda Damas va Nexia o‘rtasidagi poyga oqibatida ikki kishi halok bo‘ldi
Mashinalardagi qolgan fuqarolar turli darajadagi tan jarohatlari bilan tibbiyot muassasasiga olib ketilgan.
Surxondaryo viloyatining Uzun tumanida Damas va Nexia avtomobillari ishtirokida sodir bo‘lgan yo‘l-transport hodisasi oqibatida ikki kishi vafot etdi. Bu haqda Yo‘l harakati xavfsizligi xizmati ma’lum qildi.
Qayd etilishicha, hodisa 28-may kuni soat 23:50 atrofida Uzun tumani “Chaqar” mahallasi hududidan o‘tuvchi D-169 avtomobil yo‘lining 132-kilometrida yuz bergan.
Dastlabki ma’lumotlarga ko‘ra, 17 yoshli o‘smir to‘rt nafar sinfdoshi bilan Damas avtomobilini boshqarib ketayotgan bo‘lgan. Shu yo‘nalishda harakatlanayotgan, haydovchilik guvohnomasiga ega bo‘lmagan 20 yoshli yigit boshqaruvidagi Nexia bilan kim oʻzarga oʻynash oqibatida yo‘l-transport hodisasi sodir bo‘lgan.
Hodisa natijasida Damas avtomobilining voyaga yetmagan haydovchisi hamda Nexia avtomobilidagi yo‘lovchilardan biri voqea joyida vafot etgan. Qolgan fuqarolar turli darajadagi tan jarohatlari bilan tibbiyot muassasasiga olib ketilgan.
