O‘zbekistonda 2030-yilgacha geologiya va tog‘-kon sanoatiga 30 mlrd dollardan ortiq investitsiya jalb etiladi

Prezident Shavkat Mirziyoyevga tog‘-kon sanoati va geologiya sohasida raqamli hamda sun’iy intellekt texnologiyalarini joriy etish bo‘yicha taqdimotda 2030-yilgacha tarmoqqa 30 milliard dollardan ortiq investitsiya jalb qilish maqsad qilingani ma’lum qilindi.

 

Qayd etilishicha, investorlarni jalb etish uchun geologik ma’lumotlarning sifatli va ishonchli raqamli bazasini shakllantirish muhim ahamiyatga ega. Shu maqsadda Geologik ma’lumotlar milliy bazasini yaratish taklif etildi. Jarayon doirasida “Texnologik transformatsiya markazi” tashkil qilinib, 36 mingdan ortiq geologik hisobot va birlamchi ma’lumotlar raqamli formatga o‘tkaziladi.

 

Mutasaddilar hisob-kitoblariga ko‘ra, bu geologik ma’lumotlarni shakllantirish, konlarni modellash va zaxiralarni hisoblash jarayonlarini ikki baravar tezlashtiradi.

 

Taqdimotda 2026–2030-yillarda geologiya sohasi hamda yirik sanoat korxonalari — Navoiy kon-metallurgiya kombinati, Olmaliq kon-metallurgiya kombinati, Navoiyuran, O‘zmetkombinat, O‘zbekko‘mir hamda O‘zbekiston texnologik metallar kombinatida sun’iy intellekt va raqamli texnologiyalarni joriy etishga qaratilgan 44 ta loyihani amalga oshirish rejalashtirilgani bildirildi.

 

Loyihalar ishlab chiqarish jarayonlarini avtomatlashtirish, korporativ boshqaruvni raqamlashtirish, sun’iy intellekt texnologiyalarini joriy etish, mehnat va sanoat xavfsizligini ta’minlash hamda kon-geologiya ishlarini raqamli transformatsiya qilish kabi besh asosiy yo‘nalishni qamrab oladi.

 

Ma’lumotlarga ko‘ra, mazkur tashabbuslar natijasida operatsion samaradorlik 7 foizga, texnika va uskunalar ishonchliligi 20 foizga, energiya samaradorligi esa 8 foizga oshishi kutilmoqda. 

 

Shuningdek, inson omili bilan bog‘liq xato va xavflarni 15 foizga kamaytirish imkoniyati mavjud.

 

Taqdimotda yaratiladigan texnologik yechimlarni patentlash zarurligi ham ta’kidlandi. 

 

Yakunda mutasaddilarga tog‘-kon sanoati korxonalarining biznes-rejalariga ishlab chiqarish va mehnat resurslari samaradorligini oshirishga qaratilgan choralarni kiritish hamda texnologik va sun’iy intellekt loyihalari bo‘yicha alohida dasturlarni tasdiqlab borish yuzasidan topshiriqlar berildi.