O‘zbekistonda besh yil ichida oltin zaxirasi yana 879 tonnaga oshiriladi
Kumush zaxirasini 510 tonnaga, mis zaxirasini esa 676 ming tonnaga ko‘paytirish rejalashtirilgan.
Prezident Shavkat Mirziyoyev tog‘-kon sanoati va geologiya sohasida raqamli hamda sun’iy intellekt texnologiyalarini joriy etish yuzasidan o‘tkazilgan taqdimot bilan tanishdi.
Taqdimotda kelgusi besh yil davomida mamlakat oltin zaxiralarini qo‘shimcha 879 tonnaga oshirish bo‘yicha ishlar boshlanganligi ma’lum qilindi. Shuningdek, kumush zaxirasini 510 tonnaga, mis zaxirasini esa 676 ming tonnaga ko‘paytirish rejalashtirilgan.
Qayd etilishicha, geologiya-qidiruv ishlarida sun’iy intellekt texnologiyalaridan foydalanish geologik ma’lumotlarni tezkor tahlil qilish, yangi konlarni aniqlash va foydali qazilmalar zaxiralarini aniq baholash imkonini beradi.
Davlat rahbari sohada texnologik transformatsiyani jadallashtirish, ishlab chiqarish jarayonlarini sun’iy intellekt asosida boshqarish va tahlil qilish tizimini rivojlantirish muhimligini ta’kidladi.
Mutasaddilar hisob-kitoblariga ko‘ra, raqamli texnologiyalar va sun’iy intellekt yechimlarini keng joriy etish mahsulot tannarxini 10 foizga kamaytirish, yangi konlarni ochish muddatini ikki baravar qisqartirish hamda investorlarga taqdim etiladigan takliflar sonini to‘rt baravar oshirish imkonini beradi.
