O‘zbekiston delegatsiyasi Rossiya Prezidenti Administratsiyasi rahbariyati bilan uchrashdi

 

Moskva shahriga amalga oshirilgan uch kunlik tashrif doirasida O‘zbekiston delegatsiyasi Rossiya Prezidenti Administratsiyasining qator rahbarlari va mutasaddilari bilan uchrashuvlar o‘tkazdi. Bu haqda Prezident matbuot kotibi Sherzod Asadov ma'lum qildi.

 

Xususan, delegatsiya Rossiya Prezidenti Administratsiyasi rahbarining birinchi o‘rinbosari Sergey Kiriyenko, Prezident Administratsiyasi rahbarining o‘rinbosari – Prezident matbuot kotibi Dmitriy Peskov, Prezidentning strategik sheriklik va hamkorlik boshqarmasi boshlig‘i Vadim Titov, Prezidentning jamoat loyihalari boshqarmasi boshlig‘i Sergey Novikov hamda Prezidentning axborot-kommunikatsiya texnologiyalari va aloqa infratuzilmasini rivojlantirish boshqarmasi boshlig‘i Tatyana Matveyeva bilan muloqotlar olib bordi.

 

Tashrif davomida Rossiyaning jamoat, yoshlar, media va kreativ sohalarda faoliyat yuritayotgan qator tashkilotlari vakillari bilan ham uchrashuvlar tashkil etildi.

 

Muzokaralar chog‘ida muntazam professional muloqotni rivojlantirish, matbuot xizmatlari, tahliliy markazlar va jamoat tashkilotlari o‘rtasidagi hamkorlikni kengaytirish, tajriba almashish hamda qo‘shma ta’lim va malaka oshirish dasturlarini yo‘lga qo‘yish masalalariga alohida e’tibor qaratildi.

 

Delegatsiya, shuningdek, boshqaruv kadrlarini tayyorlashga ixtisoslashgan “Senej” boshqaruv ustaxonasi faoliyati bilan tanishdi. Mazkur markazning boshqaruv kadrlarini tayyorlashdagi ilg‘or tajribasi va innovatsion yondashuvlari katta qiziqish uyg‘otdi.

 

O‘tkazilgan uchrashuvlar media va kommunikatsiyalar sohasida ochiq muloqotni rivojlantirish, professional tajriba almashish hamda istiqbolli qo‘shma loyihalarni amalga oshirish bo‘yicha tomonlarning tayyorligini tasdiqladi.