“Do‘stlik” chegara postida valyutani poyabzali ichiga yashirgan shaxs aniqlandi
Boshqa bir yo‘lovchi ham 771 ming rublini bojxona nazoratidan yashirincha olib chiqmoqchi bo‘lgan.
Andijon viloyatidagi “Do‘stlik” chegara bojxona postida xorijiy valyutani bojxona nazoratidan yashirincha olib chiqishga uringan ikki holat fosh etildi. Bu haqda Bojxona qo‘mitasi Raisining matbuot kotibi xabar berdi.
Bojxona qo‘mitasi ma’lumotiga ko‘ra, yo‘lovchilardan biri deklaratsiya qilgan 8 ming AQSH dollaridan tashqari, yana 8 ming dollarni poyabzali ichiga yashirib olib chiqishga uringan. Tekshiruv davomida ushbu mablag‘lar aniqlanib, belgilangan tartibda rasmiylashtirilgan.
Shuningdek, yana bir yo‘lovchi 771 ming Rossiya rublini bojxona nazoratidan yashirincha olib chiqishga uringan vaqtida to‘xtatib qolingan.
Mazkur holatlar yuzasidan valyuta mablag‘lari vaqtincha saqlovga olinib, surishtiruv ishlari olib borilmoqda.
Eslatib o‘tamiz, amaldagi tartibga ko‘ra, jismoniy shaxslar O‘zbekistondan ekvivalenti 100 million so‘mgacha bo‘lgan naqd valyuta mablag‘larini bojxona qoidalariga rioya qilgan holda olib chiqishi mumkin.
