Inson huquqlari sohasidagi hamkorlik: Milliy markaz va BMT vakillari uchrashuvi boʻlib oʻtdi

 

Oʻzbekiston Respublikasi Inson huquqlari boʻyicha milliy markazi direktori Akmal Saidov BMTning Qochqinlar ishlari boʻyicha Oliy komissari boshqarmasining Markaziy Osiyo boʻyicha vakili Mahir Safarli bilan uchrashdi. Muloqotda boshqarmaning Markaziy Osiyo boʻyicha huquqiy himoya masalalari boʻyicha mutaxassisi Baljan Oshakbayeva ham ishtirok etdi.

 

Uchrashuv davomida tomonlar qochqinlar, boshpana izlovchi shaxslar hamda fuqaroligi boʻlmagan shaxslarning huquqlarini himoya qilish sohasidagi hamkorlikning bugungi holati va istiqbollari yuzasidan fikr almashdi. Shuningdek, Inson huquqlari boʻyicha milliy markaz va BMT Qochqinlar ishlari boʻyicha Oliy komissari boshqarmasi oʻrtasidagi hamkorlik aloqalarini yanada mustahkamlash masalalari muhokama qilindi.

 

                                           

 

Uchrashuv yakunida Inson huquqlari boʻyicha Oʻzbekiston Respublikasi milliy markazi hamda BMT Qochqinlar ishlari boʻyicha Oliy komissari boshqarmasi oʻrtasida 2026-yilga moʻljallangan Qoʻshma ish rejasi imzolandi.

 

Mazkur hujjatda kelgusi davr uchun hamkorlikning ustuvor yoʻnalishlari, jumladan, milliy qonunchilik va huquqni qoʻllash amaliyotini takomillashtirish, aholi hamda mutaxassislar salohiyatini mustahkamlash, shuningdek, qochqinlar va fuqaroligi boʻlmagan shaxslar huquqlarini himoya qilish borasidagi xalqaro meʼyorlarni keng joriy etish masalalari belgilab olindi.

 

                                           

 

Tomonlar oʻzaro manfaatli va konstruktiv hamkorlikni izchil davom ettirish, erishilgan kelishuvlarni amaliyotga samarali tatbiq etish hamda inson huquqlarini taʼminlash sohasidagi qoʻshma tashabbuslarni yanada kengaytirishga tayyor ekanliklarini bildirdi.