Surxondaryoda uch nafar 18 yoshli yigit cho‘kib ketdi
Ulardan 2 nafarining jasadi topilgan bo‘lib, yana birining jasadini qidirish ishlari davom etmoqda.
Surxondaryo viloyatining Jarqo‘rg‘on tumanida daryoga cho‘milishga borgan o‘smirlardan uch nafari cho‘kib ketdi. Bu haqda Surxondaryo FVB xabar berdi.
Ma’lum qilinishicha, hodisa Namuna mahallasi hududidan oqib o‘tuvchi Surxondaryo daryosida sodir bo‘lgan. 2008-yilda tug‘ilgan 6 nafar yigit daryo bo‘yiga borgan. Ulardan besh nafari cho‘milish uchun suvga tushgan, bir nafari esa qirg‘oqda qolgan.
Daryodagi kuchli oqim sabab suvga tushgan yigitlar xavfli vaziyatga tushib qolgan. Hodisa vaqtida yaqin atrofdagi fuqarolar ikki nafar o‘smirni qutqarishga muvaffaq bo‘lgan, biroq qolgan uch nafar yigitni suv oqimi olib ketgan.
Voqea joyiga qutqaruvchilar va g‘avvoslar jalb etilgan. Qidiruv-qutqaruv ishlari davomida ikki nafar yigitning jasadi topilgan va suvdan olib chiqilgan.
Ma’lumotlarga ko‘ra, hozirda oqim olib ketgan uchinchi o‘smirning jasadini qidirish ishlari davom ettirilmoqda.
