Xitoyning Buyuk Xitoy devorida O‘zbekiston terma jamoasini qo‘llab-quvvatlash tadbiri o‘tkazildi
Tadbirda nafaqat vatandoshlar, balki Qirg‘iziston, Qozog‘iston hamda boshqa mamlakatlar vakillari ham qatnashib, O‘zbekiston futbolchilariga omad tiladi.
Jahon chempionatida ilk bor ishtirok etayotgan O‘zbekiston milliy terma jamoasini qo‘llab-quvvatlash maqsadida Xitoy poytaxti Pekin shahrida, dunyoning eng mashhur tarixiy obidalaridan biri — Buyuk Xitoy devorida maxsus tadbir tashkil etildi.
Tadbir O‘zbekistonning Xitoy Xalq Respublikasidagi elchixonasi tashabbusi bilan o‘tkazilgan.Tashkilotchilar mazkur maskan bejiz tanlanmaganini, Buyuk Xitoy devori qat’iyat, matonat va g‘alabaga bo‘lgan bukilmas irodaning ramzi ekanini ta’kidlagan.
Aksiya davomida ishtirokchilar milliy liboslarda va O‘zbekiston davlat bayroqlari bilan Buyuk Xitoy devoriga ko‘tarilib, milliy terma jamoaga omad tilashgan. Tadbirda nafaqat vatandoshlar, balki Qirg‘iziston, Qozog‘iston hamda boshqa mamlakatlar vakillari ham qatnashib, O‘zbekiston futbolchilariga o‘z tilaklarini bildirgan.
Tadbir ishtirokchilari O‘zbekistonning futbol bo‘yicha Jahon chempionatiga chiqqani nafaqat mamlakat, balki butun Markaziy Osiyo uchun tarixiy voqea ekanini qayd etib, terma jamoaga musobaqada muvaffaqiyat tilashgan.
Eslatib o‘tamiz, O‘zbekiston milliy terma jamoasi 2026-yilgi Jahon chempionatidagi ilk uchrashuvini 18-iyun kuni o‘tkazadi.
