Xorijiy va nodavlat OTMlardan davlat universitetlariga o‘qishni ko‘chirish tartibi belgilandi
Hujjatlar to‘liq taqdim etilmasa yoki noto‘g‘ri ma’lumot kiritilsa, ariza rad etilishi mumkin.
Hukumatning tegishli qarori bilan xorijiy va nodavlat oliy ta’lim tashkilotlarida tahsil olayotgan talabalarning o‘qishini davlat oliy ta’lim muassasalariga ko‘chirish bo‘yicha davlat xizmatini ko‘rsatishning ma’muriy reglamenti tasdiqlandi. Bu haqda Adliya vazirligi xabar berdi.
Yangi tartibga ko‘ra, mazkur yo‘nalishdagi vakolatli davlat organi etib Bilim va malakalarni baholash agentligi belgilandi.
Reglamentga muvofiq, talabalar har yili 15-iyuldan 5-avgustga qadar Yagona interaktiv davlat xizmatlari portali, Agentlikning maxsus elektron platformasi yoki Davlat xizmatlari markazlari orqali ariza topshirishlari mumkin.
Ariza va unga ilova qilingan hujjatlar 15-iyuldan 6-avgustga qadar ko‘rib chiqiladi hamda o‘qishni ko‘chirish bo‘yicha arizani qabul qilish yoki rad etish yuzasidan qaror qabul qilinadi.
Arizani rad etish uchun hujjatlarning to‘liq taqdim etilmagani, noto‘g‘ri ma’lumotlar kiritilgani yoki belgilangan to‘lov o‘z vaqtida amalga oshirilmagani asos bo‘ladi.
Qabul yoki rad etish haqidagi qaror talabaga elektron platformalar orqali yuboriladi. Imtihon natijalari esa QR-kod shaklida rasmiylashtirilib, test sinovlari yakunlangandan so‘ng bir hafta ichida talabgorga taqdim etiladi.
