“Narkojinoyatlarga qarshi kurashda tomoshabin bo‘lib turishga hech kimning haqqi yo‘q” — Saida Mirziyoyeva

 

Prezident Administratsiyasi rahbari Saida Mirziyoyeva narkotik vositalarning noqonuniy muomalasiga qarshi kurashni kuchaytirishga qaratilgan yangi qonun qabul qilinganini bildirib, ota-onalarni bu muammoga qarshi kurashda faol bo‘lishga chaqirdi.

 

Uning ta’kidlashicha, yaqinda qabul qilingan qonun bilan yashirin narkolaboratoriyalar va bangixonalar tashkil etish, narkojinoyatlarga homiylik qilish, giyohvandlik vositalarini internet orqali yoki transmilliy tarmoqlar yordamida tarqatish kabi og‘ir qilmishlar uchun yangi javobgarlik choralari joriy etilgan. Endilikda bunday jinoyatlar uchun 20 yilgacha ozodlikdan mahrum qilish jazosi qo‘llanilishi mumkin.

 

Shuningdek, uyushgan narkojinoyatchilik uchun javobgarlik sezilarli darajada kuchaytirilgan. Yangi tartibga ko‘ra, narkojinoyat sodir etgan shaxslar muddatidan oldin ozodlikka chiqarilmaydi va jazoni to‘liq o‘taydi.

 

Saida Mirziyoyeva voyaga yetmaganlarni giyohvandlik vositalarini iste’mol qilishga undash og‘ir jinoyat sifatida baholanishini qayd etgan. Endilikda bunday qilmishlar uchun 5 yildan 10 yilgacha ozodlikdan mahrum qilish jazosi belgilangan. Ta’lim muassasalari, talabalar yotoqxonalari va bolalar oromgohlarida yoshlarni narkojinoyatlarga jalb qilgan shaxslarga nisbatan ham qat’iy choralar qo‘llanadi.

 

Prezident Administratsiyasi rahbari mazkur qonun jinoyatchilarni jazolash bilan birga, xalq salomatligi, millat genofondi va yoshlar kelajagini himoya qilishga xizmat qilishini ta’kidladi.

 

U ota-onalarni farzandlari hayotiga befarq bo‘lmaslikka, narkotiklar tahdidiga qarshi kurashda davlatning eng yaqin tayanchi bo‘lishga chaqirib, “Bolalarimiz kelajagi — millatimiz kelajagi. Bu kurashda tomoshabin bo‘lib turishga hech kimning haqqi yo‘q”, deya ta’kidlagan.