Toshkentda 20 yoshli qizni Dubayga fohishalik uchun jo‘natmoqchi bo‘lgan ayol qo'lga olindi
Gumonlanuvchi qizga chet eldagi tanishlari orqali yuqori daromadli ish topib berishni va’da qilgan.
Ichki ishlar organlari va Davlat xavfsizlik xizmati xodimlari hamkorligida o‘tkazilgan tadbir davomida Toshkent viloyatining Angren shahrida yashovchi 25 yoshli ayol qo‘lga olingan. Bu haqda Ichki ishlar vazirligi matbuot xizmati xabar berdi.
Dastlabki ma’lumotlarga ko‘ra, u Dubay shahrida yashovchi tanishlari bilan jinoiy til biriktirib, Jizzax viloyatining Mirzacho‘l tumanida yashovchi 20 yoshli fuqaroning ishonchiga kirgan. Gumonlanuvchi unga xorijda yuqori maoshli ish o‘rinlari mavjudligini aytib, chet elga jo‘natishga uringan.
Aniqlanishicha, aslida jabrlanuvchini Birlashgan Arab Amirliklariga jinsiy ekspluatatsiya maqsadida olib chiqish rejalashtirilgan. U Toshkent xalqaro aeroporti orqali Dubayga jo‘natilayotgan vaqtda tezkor tadbir ishtirokchilari tomonidan holatga chek qo‘yilgan.
Shuningdek, tergov davomida jabrlanuvchini Dubay shahrida boshqa bir O‘zbekiston fuqarosi kutib olishi rejalashtirilgani ma’lum bo‘lgan.
Mazkur holat yuzasidan gumonlanuvchiga nisbatan Jinoyat kodeksining 135-moddasi 2-qismining tegishli bandlari bilan jinoyat ishi qo‘zg‘atilgan. Hozirda tergov harakatlari olib borilmoqda.
Huquqni muhofaza qiluvchi organlar jinoyatga aloqador bo‘lishi mumkin bo‘lgan boshqa shaxslarni aniqlash va javobgarlikka tortish bo‘yicha tezkor-tergov tadbirlarini davom ettirmoqda.
