JCH-2026: Belgiya–Misr bahsida avtogol Misrni g‘alabadan mahrum qildi
G guruhidagi Belgiya–Misr uchrashuvi 1:1 hisobida yakunlandi.
2026-yilgi futbol bo‘yicha Jahon chempionatining G guruhi 1-turidan o‘rin olgan Belgiya va Misr terma jamoalari o‘rtasidagi uchrashuv durang natija bilan yakunlandi.
AQShning Sietl shahridagi “Lumen Field” stadionida bo‘lib o‘tgan bahsda jamoalar 1:1 hisobida durang natija qayd etdi. Uchrashuvni braziliyalik hakam Ramon Abatti boshqarib borgan.
Hisob 20-daqiqada misrlik futbolchi Imam Ashour tomonidan ochilgan. Misr terma jamoasi uzoq vaqt davomida ustunlikni saqlab turgan bo‘lsa-da, 66-daqiqada himoyachi Mohamed Hany tomonidan kiritilgan avtogol belgiyaliklarga muhim ochko keltirgan.
Shu tariqa, har ikki jamoa guruh bosqichini bir ochkodan boshlagan. G guruhidagi yana bir uchrashuvda Eron va Yangi Zelandiya terma jamoalari o‘zaro bahs olib boradi.
Ikkinchi turda Belgiya Eron bilan, Misr esa Yangi Zelandiya bilan kuch sinashadi. Guruh bosqichining so‘nggi turida esa Misr Eron bilan, Belgiya esa Yangi Zelandiya bilan maydonga tushadi.
2026-yilgi Jahon chempionati AQSh, Kanada va Meksikada o‘tkazilmoqda. Musobaqa 11-iyunda start olib, 19-iyul kuni yakuniga yetadi.
