JCH-2026dagi ilk sensatsiya: Ispaniya Kabo-Verdeni yenga olmadi
Ispaniya tomonidan 27 ta zarba berilganiga qaramay, o'yin 0:0 hisobidagi kutilmagan durang bilan yakunlandi.
2026-yilgi futbol bo‘yicha Jahon chempionatida ilk yirik sensatsiyalardan biri qayd etildi. Musobaqa favoritlaridan biri sanalgan Ispaniya terma jamoasi guruh bosqichidagi dastlabki uchrashuvda Kabo-Verdega qarshi bahsda g‘alaba qozona olmadi.
Uchrashuv 0:0 hisobidagi durang bilan yakunlandi. Bahs davomida ispanlar maydonda to‘liq ustunlikka ega bo‘lib, raqib darvozasi tomon 27 marta zarba yo‘llagan. Shunga qaramay, Kabo-Verde darvozaboni Vozinha ishonchli o‘yin namoyish etib, o‘z jamoasini mag‘lubiyatdan qutqarib qolgan.
Statistik ma’lumotlarga ko‘ra, Ispaniya to‘pga egalik qilish bo‘yicha 74 foizlik ustunlikka erishgan, kutilayotgan gollar (xG) ko‘rsatkichi esa 2,29 ni tashkil etgan. Kabo-Verde esa atigi 6 ta zarba yo‘llab, 0,30 xG qayd etgan.
Ispaniya safida Pedri, Ferran Torres, Mikel Oyarzabal va Dani Olmo bir necha bor xavfli vaziyatlar yaratgan bo‘lsa-da, gol urishning uddasidan chiqa olmagan. Ikkinchi bo‘limda maydonga tushgan Lamine Yamal va Niko Villiams ham hisobni o‘zgartira olmagan.
Qayd etilishicha, Kabo-Verde futbolchilari uchrashuv davomida atigi bitta qoidabuzarlik sodir etgan. Bu esa 1966-yildan buyon Jahon chempionatlari tarixidagi eng yaxshi ko‘rsatkich sifatida qayd etilgan.
Durangga qaramay, Ispaniya terma jamoasining mag‘lubiyatsiz seriyasi 32 ta o‘yinga yetdi. Biroq jamoa Jahon chempionatini kutilmagan ochko yo‘qotish bilan boshladi.
