Ko‘ksaroyda Albaniya Prezidentini rasmiy kutib olish marosimi bo‘lib o‘tdi
Marosimdan so‘ng O‘zbekiston va Albaniya yetakchilarining muzokaralari boshlandi.
16-iyun kuni Ko‘ksaroy qarorgohida O‘zbekistonga rasmiy tashrif bilan kelgan Albaniya Prezidenti Bayram Begayni tantanali kutib olish marosimi bo‘lib o‘tdi.
Qarorgoh oldidagi maydonda faxriy qorovul saf tortdi. O‘zbekiston Prezidenti oliy martabali mehmonni samimiy qarshi olib, shohsupaga taklif qildi.
Marosim davomida harbiy orkestr ijrosida O‘zbekiston va Albaniya davlat madhiyalari yangradi. Shundan so‘ng davlat rahbarlari faxriy qorovul safi oldidan o‘tib, ikki mamlakat rasmiy delegatsiyalari a’zolari bilan salomlashdilar.
Rasmiy kutib olish marosimi yakunida yetakchilar birgalikda suratga tushdi. Shundan so‘ng O‘zbekiston va Albaniya o‘rtasidagi hamkorlikning istiqbolli yo‘nalishlariga bag‘ishlangan oliy darajadagi muzokaralar boshlandi.
