O‘zbekiston va Albaniya rahbarlari o'rtasida muzokaralar bo'lib o'tdi
Muzokaralar yakunida Prezidentlar Faxriy mehmonlar xiyobonida birgalikda daraxt ekdi.
Ko‘ksaroy qarorgohida O‘zbekiston Prezidenti va Albaniya Prezidenti rasmiy delegatsiyalar ishtirokida muzokaralar o‘tkazdi.
Uchrashuvda ikki davlat o‘rtasidagi siyosiy, savdo-iqtisodiy, investitsiyaviy va madaniy-gumanitar hamkorlikni kengaytirish istiqbollari muhokama qilingan.
Shavkat Mirziyoyev O‘zbekiston va Albaniya munosabatlari tarixida ilk bor o‘tkazilayotgan ushbu sammit ikki tomonlama aloqalarni sifat jihatidan yangi bosqichga olib chiqishini ta’kidlagan.
Muzokaralarda tovar ayirboshlash hajmini oshirish, agrosanoat majmui, “yashil” energetika, geologiya, axborot texnologiyalari, raqamlashtirish va turizm sohalarida qo‘shma loyihalarni amalga oshirish masalalariga alohida e’tibor qaratilgan.
Shuningdek, O‘zbekiston mahsulotlarini Janubiy Yevropa va O‘rta yer dengizi bozorlariga eksport qilishda Albaniyaning Durres portidan logistika markazi sifatida foydalanish imkoniyatlarini o‘rganishga kelishib olingan.
Tomonlar iqtisodiy va investitsiyaviy hamkorlikning huquqiy asoslarini mustahkamlash, Hukumatlararo komissiya tashkil etish hamda uning ilk yig‘ilishini joriy yilda Toshkent shahrida o‘tkazish bo‘yicha kelishuvga erishishgan.
Madaniy-gumanitar yo‘nalishda esa Madaniyat kunlari, kino haftaliklari, ko‘rgazmalar va ijodiy almashinuv dasturlarini yo‘lga qo‘yish muhimligi qayd etilgan.
Oliy darajadagi muzokaralar yakunida Shavkat Mirziyoyev va Bayram Begay Faxriy mehmonlar xiyobonida birgalikda daraxt ekdi. Ushbu ramziy tadbir O‘zbekiston va Albaniya xalqlari o‘rtasidagi do‘stlik va hamkorlik aloqalarining mustahkamlanib borayotganini ifodaladi.
