Germaniya prezidenti O‘zbekistonga keldi
Tashrif dasturiga muvofiq, ikki davlat rahbarlarining tor va kengaytirilgan tarkibdagi muzokaralari o‘tkaziladi.
Prezident Shavkat Mirziyoyevning taklifiga binoan Germaniya Prezidenti Frank-Valter Shtaynmayyer rafiqasi hamrohligida O‘zbekistonga rasmiy tashrif bilan keldi.
“Toshkent-Humo” xalqaro aeroportida oliy martabali mehmonni O‘zbekiston Bosh vaziri o‘rinbosari Ochilboy Ramatov hamda boshqa rasmiylar kutib oldi.
Tashrif dasturiga muvofiq, ikki davlat rahbarlarining tor va kengaytirilgan tarkibdagi muzokaralari o‘tkazilishi rejalashtirilgan. Unda O‘zbekiston – Germaniya ko‘p qirrali munosabatlarini yanada rivojlantirish istiqbollari muhokama qilinadi.
Tomonlar savdo-iqtisodiy hamkorlik, sanoat kooperatsiyasi, energetika va “yashil” texnologiyalar, transport va logistika, farmatsevtika hamda kimyo sanoati, qishloq xo‘jaligi kabi yo‘nalishlarda amaliy hamkorlikni kengaytirishga alohida e’tibor qaratadilar.
Shuningdek, ta’lim va gumanitar almashinuvlarni rivojlantirish masalalari ham kun tartibidan o‘rin olgan. Muzokaralar davomida xalqaro va mintaqaviy ahamiyatga ega dolzarb masalalar yuzasidan fikr almashilishi kutilmoqda.
Tashrif doirasida bir qator yangi qo‘shma loyiha va dasturlarni amalga oshirish bo‘yicha kelishuvlarga erishilishi rejalashtirilgan.
