O‘zbekiston Prezidenti BAA energetika va infratuzilma vazirini qabul qildi
Toshkent investitsiya forumi doirasida yangi qo‘shma kelishuvlar imzolanishi kutilmoqda.
Prezident Shavkat Mirziyoyev Birlashgan Arab Amirliklari energetika va infratuzilma vaziri Suhayl al-Mazruiy boshchiligidagi delegatsiyani qabul qildi.
Uchrashuv avvalida vazir davlat rahbariga BAA Prezidenti Shayx Muhammad Ol Nahayon, Bosh vaziri, Dubay amiri Shayx Muhammad Ol Maktum, Vitse-prezidenti Shayx Mansur Ol Nahayon hamda Abu-Dabi Amirligi valiahdi Shayx Holid Ol Nahayonning samimiy salomi va ezgu tilaklarini yetkazdi.
Muloqot chog‘ida O‘zbekiston va Birlashgan Arab Amirliklari o‘rtasidagi strategik sheriklik munosabatlari jadal rivojlanib borayotgani alohida ta’kidlandi.
Tomonlar o‘zaro savdo va investitsiyalar hajmi ortib borayotgani, shuningdek, qo‘shma korxonalar soni kengayayotganini mamnuniyat bilan qayd etdilar. V Toshkent xalqaro investitsiya forumi doirasida BAA kompaniyalari ishtirokida yangi yirik kelishuvlar imzolanishi kutilayotgani qayd etildi.
Shuningdek, “yashil” energetika, yoqilg‘i ishlab chiqarish, transport va logistika, sun’iy intellekt, raqamlashtirish hamda boshqa istiqbolli yo‘nalishlarda yirik investitsiya loyihalarini jadallashtirish bo‘yicha kelishuvga erishildi.
