Shavkat Mirziyoyev Qozog‘iston Bosh vazirini qabul qildi
Uchrashuvda iyul oyidagi Hukumatlararo komissiya yig‘ilishi va Aqtau shahridagi hududlar rahbarlari Kengashiga tayyorgarlik masalalari ko‘rib chiqildi.
V Toshkent xalqaro investitsiya forumi doirasida Shavkat Mirziyoyev Qozog‘iston Bosh vaziri Oljas Bektenovni qabul qildi.
Uchrashuv avvalida Oljas Bektenov davlat rahbariga Qasim-Jomart Toqayevning samimiy salomi va ezgu tilaklarini yetkazdi.
Muloqot chog‘ida O‘zbekiston va Qozog‘iston o‘rtasidagi strategik sheriklik hamda ittifoqchilik munosabatlarini yanada rivojlantirishning dolzarb masalalari muhokama qilindi.
Tomonlar barcha darajalardagi faol muloqot va hamkorlikning izchil rivojlanayotganini mamnuniyat bilan qayd etdilar. Tovar ayirboshlash hajmi ortib borayotgani, shuningdek, yaqinda qabul qilingan yangi “yo‘l xaritasi” asosida iqtisodiyotning ustuvor tarmoqlarida kooperatsiya loyihalari izchil amalga oshirilayotgani ta’kidlandi.
Shuningdek, iyul oyida o‘tkaziladigan Hukumatlararo komissiya yig‘ilishi hamda Qozog‘istonning Aqtau shahrida bo‘lib o‘tadigan hududlar rahbarlarining birinchi Kengashiga puxta tayyorgarlik ko‘rish muhimligi qayd etildi.
