Toshkent investitsiya forumi: 100 mamlakatdan 4 mingdan ziyod ishtirokchi
Forumda O‘zbekiston iqtisodiyoti uchun 6 ta ustuvor yo‘nalish belgilandi.
Bu yilgi Toshkent xalqaro investitsiya forumi dunyoning 100 dan ortiq mamlakatidan 4 mingdan ziyod ishtirokchini o‘zida jamladi. Nufuzli anjuman dasturi g‘oyat sermazmun bo‘lib, unda dolzarb global iqtisodiy masalalar muhokamasi, shuningdek, turli davlatlar hukumatlari va xalqaro tashkilotlar vakillari, yirik investorlar hamda ekspertlar bilan ikki tomonlama va ko‘p tomonlama uchrashuvlar o‘rin oldi.
Forum doirasida Shavkat Mirziyoyev mamlakat iqtisodiy o‘sishini ta’minlashga qaratilgan oltita ustuvor yo‘nalishni belgilab berdi. Ushbu yo‘nalishlar orasida kapital bozorini rivojlantirish, “yashil” iqtisodiyotga o‘tish, sun’iy intellekt texnologiyalarini keng joriy etish hamda investorlarning huquqiy himoyasini yanada kuchaytirish kabi muhim vazifalar mavjud.
Shuningdek, O‘zbekiston o‘zining investitsiyaviy jozibadorligini izchil oshirib bormoqda. So‘nggi besh yil davomida mamlakat iqtisodiyotiga 123 milliard dollardan ortiq investitsiyalar jalb etildi. Endilikda asosiy vazifa — erishilgan kelishuvlarni real sektor, biznes va aholi farovonligiga xizmat qiluvchi amaliy loyihalarga aylantirishdan iborat ekani ta’kidlandi.
