Toshkentda Volkswagen avtomobillarini yig‘ish loyihasi ishga tushirildi

Shavkat Mirziyoyev va Germaniya Prezidenti Frank-Valter Shtaynmayer muzokaralar yakunlari bo‘yicha Qo‘shma bayonot qabul qilib, ko‘p qirrali O‘zbekiston–Germaniya hamkorligini yanada mustahkamlashga intilishlarini tasdiqladilar.

 

Davlat rahbarlari O‘zbekistonda qo‘shma loyihalarni amalga oshirayotgan hamda yangi tashabbuslarni yo‘lga qo‘yishni rejalashtirayotgan Germaniyaning yetakchi kompaniyalari vakillarini samimiy qutladilar.

 

Uchrashuv doirasida ikki tomonlama hujjatlarni almashish marosimi ham bo‘lib o‘tdi. Unda shaharlarni barqaror rivojlantirishga qaratilgan loyihalarni amalga oshirish uchun grant mablag‘lari ajratish va imtiyozli moliyalashtirishni nazarda tutuvchi moliyaviy hamkorlik kelishuvlari imzolandi.

 

Shuningdek, davlat rahbarlari huzurida bir qator qo‘shma investitsiya va ta’lim loyihalariga start berildi. Xususan, Toshkent shahrida “Volkswagen” avtomobillarini yirik uzelli yig‘ish ishlab chiqarishini tashkil etish, Andijon viloyatida logistika markazini barpo etish, suyuq maishiy yuvish vositalari ishlab chiqarish, temir yo‘l sohasi uchun mutaxassislar tayyorlash hamda zamonaviy imtihon markazlarini ochish kabi loyihalar shular jumlasidan.

 

Mazkur tashabbuslar sanoat kooperatsiyasini kengaytirish, infratuzilmani rivojlantirish, yangi ish o‘rinlarini yaratish hamda O‘zbekiston va Germaniya o‘rtasidagi strategik sheriklikni yanada mustahkamlashga xizmat qilishi ta’kidlandi.