Baxtiyor Islomov Oliy sud raisi lavozimidan ozod etiladi
Prezident tomonidan Baxtiyor Islomovni Oliy sud raisi lavozimidan ozod etish to‘g‘risida Senatga taqdimnoma kiritildi.
Prezident Shavkat Mirziyoyev tomonidan Baxtiyor Islomovni Oliy sud raisi lavozimidan ozod etish to‘g‘risidagi taqdimnoma Oliy Majlis Senatiga kiritildi.
Baxtiyor Islomov 2022-yil avgust oyida Oliy Majlis Senatining yalpi majlisida Oliy sud raisi etib saylangan edi.
U mazkur lavozimiga qadar Farg‘ona va Toshkent viloyatlarida sudya sifatida faoliyat yuritgan, shuningdek, 2020-yil noyabrigacha jinoyat ishlari bo‘yicha Toshkent shahar sudi raisi lavozimida ishlagan.
Keyinchalik u prezidentning fuqarolar huquqlarini himoya qilish va murojaatlar bilan ishlash masalalari bo‘yicha maslahatchisining birinchi o‘rinbosari etib tayinlangan. Oradan bir yil o‘tib esa prezidentning huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi lavozimini egallagan.
Baxtiyor Islomov Oliy sud raisi lavozimida Kozimjon Komilovdan keyin ish boshlagan edi. Kozimjon Komilov sog‘lig‘i bilan bog‘liq sabablarga ko‘ra lavozimidan ozod etishni so‘rab murojaat qilgan.
