Navoiyda rulda uxlab qolgan Cobalt haydovchisi YTHga uchrab, vafot etdi
2026-yil boshidan buyon viloyatda haydovchilarning boshqaruv vaqtida uxlab qolishi bilan bog‘liq 10 ta YTH sodir bo‘lgan.
Navoiy viloyatining Tomdi tumanida sodir bo‘lgan yo‘l-transport hodisasi oqibatida Cobalt avtomobili haydovchisi vafot etdi.
Viloyat IIB ma’lumotiga ko‘ra, hodisa 10-iyun kuni yuz bergan. Haydovchi charchoq sabab avtomobilni boshqarayotgan vaqtida uxlab qolgan va oqibatda transport vositasi YTHga uchragan.
Haydovchiga zudlik bilan tibbiy yordam ko‘rsatilgan, biroq shifokorlarning sa’y-harakatlariga qaramay, u shifoxonada vafot etgan.
Mazkur hodisa yuzasidan haydovchining ish joyida muhokama o‘tkazilib, avariyaga olib kelgan omillar tahlil qilingan. Mutasaddilar tomonidan haydovchilarga charchoq holatida rulga o‘tirmaslik, tezlikni oshirmaslik hamda uzoq safarga chiqishdan oldin yetarlicha dam olish tavsiya etilgan.
Qayd etilishicha, joriy yil boshidan buyon Navoiy viloyatida haydovchilarning boshqaruv vaqtida uxlab qolishi bilan bog‘liq 10 ta yo‘l-transport hodisasi sodir bo‘lgan. Oqibatda uch kishi halok bo‘lgan, yana 12 nafar fuqaro turli darajadagi tan jarohatlarini olgan.
