O‘zbekiston va Germaniya birinchi xonimlari uchrashdi
Germaniya birinchi xonimi O‘zbekistondagi inklyuziv ta’lim tizimini yuqori baholadi.
Germaniya Prezidenti Frank-Valter Shtaynmayerning O‘zbekistonga rasmiy tashrifi doirasida O‘zbekiston Birinchi xonimi Ziroat Mirziyoyeva va Germaniya Birinchi xonimi Elke Byudenbenderning uchrashuvi bo‘lib o‘tdi.
Muloqotdan so‘ng birinchi xonimlar Ijtimoiy himoya milliy agentligi huzuridagi Xalqaro inklyuziv xab faoliyati bilan yaqindan tanishdilar.
Tashrif davomida mehmonlarga mazkur markazning inklyuziv kasbiy ta’limni rivojlantirish, zamonaviy ta’lim texnologiyalarini joriy etish hamda yoshlar, jumladan nogironligi bo‘lgan shaxslarni mehnat bozorida talab yuqori bo‘lgan kasb va ko‘nikmalarga o‘qitish bo‘yicha amalga oshirayotgan ishlari haqida ma’lumot berildi.
Davlat rahbarlarining rafiqalari markazdagi o‘quv ustaxonalari va loyihalari bilan tanishib, tahsil olayotgan yoshlar bilan samimiy muloqot qildilar.
Germaniya birinchi xonimi Elke Byudenbender O‘zbekistonda inklyuziv jamiyatni shakllantirish, kasbiy ta’lim tizimini takomillashtirish va yoshlar uchun teng imkoniyatlar yaratish borasida amalga oshirilayotgan amaliy ishlarni yuqori baholadi.
