O‘zbekiston va YTTB o‘rtasidagi loyihalar portfeli 7 milliard dollardan oshdi
Shavkat Mirziyoyev YTTB prezidenti Odil Reno-Basso boshchiligidagi delegatsiyani qabul qildi.
18-iyun kuni Shavkat Mirziyoyev Xorijiy investorlar kengashining navbatdagi yig‘ilishi doirasida Yevropa tiklanish va taraqqiyot banki prezidenti Odil Reno-Basso boshchiligidagi delegatsiyani qabul qildi.
Uchrashuvda Yangi O‘zbekistonda amalga oshirilayotgan islohotlar dasturini qo‘llab-quvvatlash doirasida Yevropa tiklanish va taraqqiyot banki bilan amaliy hamkorlikni yanada kengaytirish hamda strategik sheriklikni mustahkamlash masalalari muhokama qilindi.
Tomonlar O‘zbekiston va YTTB o‘rtasidagi hamkorlik bugungi kunda eng yuqori darajaga ko‘tarilganini mamnuniyat bilan qayd etdilar. Hozirda mamlakatimiz bankning mintaqadagi eng yirik hamkori hisoblanadi. Ustuvor yo‘nalishlardagi qo‘shma loyihalar portfeli 7 milliard dollardan oshgani, investitsiyalarning asosiy qismi xususiy sektorni rivojlantirishga yo‘naltirilgani alohida ta’kidlandi.
Ekologik transportni rivojlantirish, temir yo‘l infratuzilmasini raqamlashtirish, tadbirkorlikni qo‘llab-quvvatlash, ipoteka bozori hamda startaplar ekotizimini rivojlantirish sohalarida yangi kelishuvlar imzolangani mamnuniyat bilan qayd etildi.
Joriy yilda kichik va o‘rta biznesni kreditlash hajmini kengaytirish, eksportni moliyalashtirish, ayollar va yoshlarni tadbirkorlikka o‘qitish dasturlarini amalga oshirish, qishloq xo‘jaligi va oziq-ovqat tarmoqlarini rivojlantirish, shuningdek, bank-moliya tizimini transformatsiya qilish jarayonlarida YTTB ishtirokini kuchaytirish ustuvor vazifalar sifatida belgilandi.
Ta’lim, sog‘liqni saqlash hamda transport infratuzilmasi sohalarida davlat-xususiy sheriklik asosidagi loyihalarni ilgari surish rejalari ham qo‘llab-quvvatlandi.
Shuningdek, loyihalarni tayyorlash mexanizmlarini takomillashtirish va ularning samaradorligini oshirish maqsadida Yevropa tiklanish va taraqqiyot banki ekspertlarini keng jalb etishdan manfaatdorlik bildirildi.
Uchrashuvda Xorijiy investorlar kengashining bo‘lajak to‘rtinchi yig‘ilishi kun tartibiga doir masalalar ham ko‘rib chiqildi.
