Toshkent va Masqat o‘rtasida to‘g‘ridan-to‘g‘ri aviaqatnovlar yo‘lga qo‘yiladi
Shavkat Mirziyoyev O‘mon Sultonligi iqtisodiyot vaziri boshchiligidagi delegatsiyani qabul qildi.
Prezident Shavkat Mirziyoyev Toshkent xalqaro investitsiya forumida ishtirok etish uchun mamlakatimizga kelgan O‘mon Sultonligi iqtisodiyot vaziri Xamis bin Sayf al-Jabriy boshchiligidagi delegatsiyani qabul qildi.
Uchrashuv avvalida O‘mon Sultoni Haysam bin Toriq Ol Saidning davlat rahbariga samimiy salomi yetkazildi.
Muloqot davomida O‘zbekiston va O‘mon o‘rtasida savdo-iqtisodiy va investitsiya-moliyaviy hamkorlikni yanada jadallashtirish masalalari muhokama qilindi.
So‘nggi yillarda ikki mamlakat o‘rtasidagi aloqalar faollashib borayotgani, tovar ayirboshlash hajmi izchil o‘sayotgani qayd etildi. O‘zbekiston–O‘mon investitsiya kompaniyasi ishtirokida bir qator muhim loyihalar muvaffaqiyatli amalga oshirilayotgani alohida ta’kidlandi.
Shuningdek, kelgusida poytaxtlar o‘rtasida to‘g‘ridan-to‘g‘ri aviaqatnovlar yo‘lga qo‘yilishi rejalashtirilgani ma’lum qilindi.
Tomonlar joriy yilda Masqat shahrida Hukumatlararo qo‘shma komissiyaning navbatdagi yig‘ilishini o‘tkazishga kelishib oldilar.
Uchrashuvda transport, logistika, geologiya, elektron tijorat, raqamli infratuzilma hamda boshqa istiqbolli yo‘nalishlarda hamkorlikni kengaytirish masalalariga alohida e’tibor qaratildi.
