62 zarba va birorta gol yo‘q: Turkiya mundialda anti-rekord qayd etdi
Turkiya terma jamoasining dastlabki ikki o‘yindagi samarasizligi Jahon chempionati tarixida yangi anti-rekord sifatida qayd etildi.
Turkiya terma jamoasi 2026-yilgi Jahon chempionatida anti-rekord qayd etdi. Bu haqda Opta statistika portali ma’lumotlariga tayanib xabar berildi.
Ma’lum qilinishicha, turk futbolchilari guruh bosqichidagi dastlabki ikki uchrashuvda raqib darvozasi tomon jami 62 marta zarba yo‘llagan bo‘lsa-da, birorta gol ura olmagan. Opta 1966-yildan buyon yuritib kelayotgan statistikaga ko‘ra, bu Jahon chempionati tarixidagi ikki o‘yinlik davr uchun eng yomon natija hisoblanadi.
Turkiya terma jamoasi birinchi turda Avstraliyaga 0:2 hisobida imkoniyatni boy bergan bo‘lsa, ikkinchi uchrashuvda Paragvayga 0:1 hisobida mag‘lub bo‘lgan. Shu tariqa jamoa guruh bosqichi yakunlanmasidan turib pley-off yo‘llanmasi uchun kurashdan chiqib ketgan.
Shuningdek, Opta ma’lumotlariga ko‘ra, Turkiya himoyachisi Abdulkarim Bardakchi bitta uchrashuvda 98 ta aniq uzatma amalga oshirib, Jahon chempionatida xatosiz uzatmalar bo‘yicha yangi rekord o‘rnatgan.
2026-yilgi Jahon chempionati AQSH, Meksika va Kanada mezbonligida o‘tkazilmoqda. Musobaqa 11-iyunda boshlangan bo‘lib, 19-iyulga qadar davom etadi. Amaldagi jahon chempioni — Argentina terma jamoasi.
