“Har bir sudya egnidagi mantiyasiga munosib bo‘lishi lozim” — Saida Mirziyoyeva
Saida Mirziyoyeva Oliy sudning yangi raisi Robaxon Mahmudovani sudyalar hamjamiyati hamda huquqni muhofaza qiluvchi organlar rahbarlariga tanishtirdi.
22 iyun kuni Oliy sudning yangi raisi Robaxon Mahmudova sudyalar hamjamiyati hamda huquqni muhofaza qiluvchi organlar rahbarlariga tanishtirildi. Bu haqda Prezident administratsiyasi rahbari Saida Mirziyoyeva ma’lum qildi.
“Prezidentimiz odamlar uchun eng muhim qadriyatlardan biri — adolat ekanini ko‘p bor ta’kidlaganlar. Jamiyatimizda qonunsizlik va korrupsiyaga aslo o‘rin qolmasligi shart. Zero, rivojlanish va farovonlikka qaratilgan har qanday islohot faqat mustaqil sudning ishonchli himoyasidagina chinakam kuchga ega bo‘ladi”, deya yozdi Mirziyoyeva
Shuningdek, u hozirda Toshkent xalqaro moliya markazida Angliya huquqiga asoslangan sud tizimi shakllantirilayotganini bildirib, amaldagi sudlar ham ilg‘or xalqaro tajribalarni o‘z faoliyatiga joriy etishi muhimligini ta’kidladi.
"Tizim alohida shaxslarga bog‘lanib qolmasdan, kadrlar almashinuvidan qat’i nazar, soat mexanizmi kabi aniq va uzluksiz ishlashi kerak. Har bir sudya sharafi va sha’nini yuksak darajada saqlagan holda egnidagi mantiyasiga munosib bo‘lishi lozim", dedi u.
Yakunda u Robaxon Mahmudovaga faoliyatida muvaffaqiyatlar tiladi.
