Kuchli yog‘ingarchilik sabab ayrim hududlarni suv toshqini kuzatilishi mumkin

 

“O‘zgidromet” agentligi direktori Sherzod Habibullayevning ma’lum qilishicha, joriy yilning 23–27-iyun kunlari respublikaning qator tog‘oldi va tog‘li hududlarida kutilayotgan yog‘ingarchiliklar sabab sel-suv toshqinlari yuzaga kelishi mumkin.

 

Xususan, Qashqadaryo viloyatining Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlari, Surxondaryo viloyatining Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on va Muzrobot tumanlari xavfli hududlar qatoriga kiritilgan.

 

Shuningdek, Samarqand viloyatining Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlari, Navoiy viloyatining Xatirchi, Navbahor, Nurota, Konimex va Karmana tumanlarida ham sel-suv toshqinlari yuzaga kelishi mumkin.

 

Jizzax viloyatining Zomin, Baxmal, G‘allaorol, Sharof Rashidov, Forish va Yangiobod tumanlari, Toshkent viloyatining Ohangaron, Bo‘stonliq, Parkent, Piskent, O‘rta Chirchiq, Yuqori Chirchiq tumanlari hamda Angren va Olmaliq shaharlarida ham xavf yuqori ekanligi ta’kidlangan.

 

Bundan tashqari, Namangan viloyatining Pop, Kosonsoy, Chortoq, Chust, Namangan va Yangiqo‘rg‘on tumanlari, Farg‘ona viloyatining So‘x, Shohimardon, Farg‘ona va Beshariq tumanlari, Andijon viloyatining Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod va Marhamat tumanlari hamda Xonobod shahrida ham sel hodisalari kuzatilishi mumkin.

 

“O‘zgidromet” ma’lumotiga ko‘ra, kuchli yog‘ingarchilik ayrim hududlarda yomg‘ir suvlarining to‘planishiga sabab bo‘lib, hududlarni suv bosishi ehtimoli ham mavjud.

 

Shu munosabat bilan tog‘oldi va tog‘li hududlarda yashovchi fuqarolar, dam oluvchilar hamda ushbu hududlarda harakatlanayotgan haydovchilarga ehtiyot choralarini ko‘rish, ob-havo ma’lumotlarini kuzatib borish va xavfsizlik qoidalariga qat’iy rioya etish tavsiya etildi.