Surxondaryoda sel Tojikistonga o‘tish ko‘prigini cho‘ktirdi
Sariosiyodagi xalqaro ahamiyatga ega ko‘prikka sel jiddiy zarar yetkazdi, harakat vaqtincha to‘xtatildi.
Surxondaryo viloyatining Sarosiyo tumanida kuchli yog'ingarchilik sabab sel hodisasi yuzaga keldi. Bu haqda FVV xabar berdi.
Ma'lum qilinishicha, 21-iyun kuni sel toshqini sel yo‘lidan oqib o‘tib, "Bog‘i Samarqand" va "Shirin" MFY hududida joylashgan bir nechta aholi xonadonlariga va tomorqalariga suv kirishi kuzatilgan.
Shuningdek, yuzaga kelgan tabiiy ofat Saroisiyo tumanidagi O‘zbekiston va Tojikistonni bog‘lovchi M41 avtomobil yolidagi ko‘prikning cho‘kishiga sabab bo‘ldi.
Bunga mutaxassislar yog‘ingarchilik oqibatida daryodagi suv sathi hamda oqim tezligi ortib, natijada avtoko‘prik tayanchlariga yuqori bosim tushib uning cho‘kishiga sabab bo‘lganini bildirmoqda.
1977-yilda qurilgan mazkur ko‘prikdan hozirda harakatlanish cheklangan . Mashinalar harakati esa Uzun tumani hududidagi aylanma yo‘nalish bo‘yicha tashkil etilgan.
