Xavfsizlik kamari taqmaslikka ruxsat beruvchi tibbiy ma’lumotnoma onlayn berila boshlandi
Xizmatdan foydalanish uchun fuqaro avval tibbiyot muassasasida shifokorlar ko‘rigidan o‘tgan bo‘lishi lozim.
Xavfsizlik kamari taqishga to‘sqinlik qiluvchi kasalliklarga ega fuqarolar uchun tibbiy ma’lumotnomani endilikda onlayn olish mumkin.
Ma’lum qilinishicha, xizmat orqali fuqarolar poliklinikaga qayta murojaat qilmasdan, navbat kutmasdan va qog‘oz hujjatlarsiz ma’lumotnomani elektron shaklda yuklab olishlari mumkin.
Mazkur xizmat avtotransport boshqaruvida xavfsizlik kamarini taqishga to‘sqinlik qiluvchi kasallik tashxisi qo‘yilgan fuqarolar uchun mo‘ljallangan.
Ma’lumotnomani olish uchun foydalanuvchi my.gov.uz portali yoki uning mobil ilovasiga kirib, “Ma’lumotnomalar” bo‘limidagi tegishli xizmatni tanlashi va hujjatni yuklab olishi kerak.
Xizmatdan foydalanish uchun fuqaro avval tibbiyot muassasasida shifokorlar ko‘rigidan o‘tgan bo‘lishi lozim. Tibbiy xulosa elektron bazaga kiritilgach, ma’lumotnoma portalda avtomatik ravishda shakllanadi.
Ma’lumotnomaning amal qilish muddati tibbiy xulosada ko‘rsatilgan davr bilan belgilanadi. Xizmat bepul taqdim etiladi va uni olish uchun qo‘shimcha hujjatlar talab etilmaydi.
Eslatib o‘tamiz, xavfsizlik kamarini taqmaslikka ruxsat beriladigan kasalliklar ro‘yxati tasdiqlangandi. Ro‘yxatga jarohatlar, og‘ir yurak-o‘pka kasalliklari va jismoniy holatlar kiritilgan.
