O‘zbekistonning Efiopiyadagi birinchi elchisi tayinlandi
O‘zbekistonning Efiopiyadagi ilk elchisi Ashraf Xodjayev bir vaqtda Qatar va Janubiy Afrikadagi elchi ham hisoblanadi.
O‘zbekistonning Efiopiyadagi birinchi elchisi etib tayinlangan Ashraf Xodjayev Efiopiya Federativ Demokratik Respublikasi Prezidenti Taye Atske-Selassiega ishonch yorliqlarini topshirdi. Bu haqda “Dunyo” axborot agentligi ma’lum qildi.
Rasmiy marosimdan so‘ng tomonlar O‘zbekiston va Efiopiya o‘rtasidagi hamkorlik istiqbollari yuzasidan fikr almashdi. Efiopiya rahbari O‘zbekistonning mamlakatdagi elchisi tayinlanganini mamnuniyat bilan qarshi olib, ikki tomonlama munosabatlarni yanada rivojlantirish va amaliy hamkorlikni kengaytirish muhimligini ta’kidladi.
Ashraf Xodjayev uchrashuv davomida O‘zbekiston Prezidenti Shavkat Mirziyoyevning samimiy salomi va ezgu tilaklarini yetkazdi. Shuningdek, u savdo-iqtisodiy va boshqa yo‘nalishlardagi o‘zaro manfaatli hamkorlikni kengaytirishga tayyor ekanini bildirdi.
O‘z navbatida, Efiopiya Prezidenti O‘zbekiston rahbariga ikki davlat o‘rtasidagi aloqalarni rivojlantirishga qaratilgan sa’y-harakatlar uchun minnatdorlik bildirib, o‘z tilaklarini yo‘lladi.
Ma’lumot uchun, O‘zbekiston va Efiopiya o‘rtasidagi diplomatik munosabatlar 1996-yil 15-iyulda o‘rnatilgan.
Ashraf Xodjayev 2024-yil fevral oyidan buyon O‘zbekistonning Qatardagi elchisi sifatida faoliyat yuritmoqda. U 2025-yil oktyabridan boshlab o‘rindoshlik asosida O‘zbekistonning Janubiy Afrikadagi elchisi sifatida ham akkreditatsiyadan o‘tgan.
