“Andijon polkasi” tadbiriga ketayotgan o‘quvchilar YTHga uchradi, bir bola vafot etdi
Tadbirga olib borish uchun avtobus ajratilganiga qaramay, ayrim o‘quvchilar Damasda yo‘lga chiqqan va ZIL yuk mashinasi bilan to‘qnashgan.
Andijon viloyatining Asaka tumanida maktab o‘quvchilari ishtirokidagi yo‘l-transport hodisasi sodir bo‘ldi. Fojia oqibatida bir nafar o‘quvchi vafot etgan.
Ijtimoiy tarmoqlarda 14-maktab o‘quvchilari “Andijon polkasi” tadbiridan qaytayotgan vaqtida YTHga uchragani haqida xabarlar tarqalgan edi. Holat yuzasidan Andijon viloyati Yo‘l harakati xavfsizligi boshqarmasi axborot xizmati “Daryo”ga ma’lum qildi.
Qayd etilishicha, hodisa 23-iyun kuni sodir bo‘lgan. Asaka tumani maktabgacha va maktab ta’limi bo‘limi tomonidan Andijon shahrida o‘tkaziladigan tadbirga qatnashuvchi o‘quvchilar uchun maxsus avtobus ajratilgan. Biroq bir guruh o‘quvchilar belgilangan transportdan foydalanmay, o‘zboshimchalik bilan Damas rusumli avtomobilda yo‘lga chiqqan.
Yo‘l davomida Damas avtomobili ZIL yuk mashinasi bilan to‘qnashib ketgan. Hodisa oqibatida o‘quvchilar turli tan jarohatlari bilan shifoxonaga olib borilgan. Shifokorlarning ko‘rsatgan tibbiy yordamiga qaramay, ulardan birining hayotini saqlab qolishning imkoni bo‘lmagan.
Rasmiy ma’lumotga ko‘ra, qolgan o‘quvchilarning ahvoli qoniqarli bo‘lib, ularga zarur tibbiy yordam ko‘rsatilmoqda.
Mazkur holat yuzasidan Asaka tumani IIB huzuridagi tergov bo‘limi tomonidan surishtiruv va tergov harakatlari olib borilmoqda.
Eslatib o‘tamiz, Andijon viloyatida “Turk dunyosining madaniy poytaxti — 2026” xalqaro tadbirlari doirasida o‘tkazilgan “Andijon polkasi” raqsi Ginnes rekordlar kitobiga kiritilgani ma’lum qilingan edi.
