Futbolchilardan shikoyatim yo‘q, ular qo‘lidan kelganini qildi — Fabio Kannavaro

O‘zbekiston milliy terma jamoasi bosh murabbiyi Fabio Kannavaro Kongo DRga qarshi uchrashuv yakunlanganidan so‘ng tashkil etilgan matbuot anjumanida o‘yin haqida o‘z fikrlarini bildirdi.

 

Mutaxassisning ta’kidlashicha, jamoa uchrashuvning birinchi bo‘limini yaxshi boshlagan va bir qator xavfli vaziyatlar yaratgan. Uning so‘zlariga ko‘ra, futbolchilar ilk taymda katta hajmdagi jismoniy ishni bajargan.

 

Kannavaro ikkinchi bo‘limda yo‘l qo‘yilgan xatolar natijaga salbiy ta’sir ko‘rsatganini qayd etgan. Shuningdek, raqibning ham jismoniy jihatdan yaxshi tayyorgarlikka ega jamoa ekanini ta’kidlagan.

 

Bosh murabbiy mazkur musobaqa o‘zi va futbolchilar uchun muhim tajriba bo‘lganini bildirib, bu kelgusidagi uchrashuvlar uchun qo‘shimcha motivatsiya berishiga ishonch bildirgan.

 

Shuningdek, u futbolchilar bilan musobaqa davomida muntazam muloqot qilganini, guruh bosqichidayoq kuchli raqiblarga qarshi o‘ynashlarini bilishganini aytgan. Murabbiy natijadan afsusdaligini bildirar ekan, futbolchilarni tanqid qilish niyati yo‘qligini ta’kidlagan.

 

"Men futbolchilardan umuman shikoyat qilmoqchi emasman. Ular qo‘lidan kelgan barcha ishni qildi va men ular bilan faxrlanaman", — degan Fabio Kannavaro.