Shavkat Mirziyoyev Gurbanguli Berdimuhamedovni tavallud kuni bilan tabrikladi
Telefon muloqotida O‘zbekiston Prezidenti unga mustahkam sog‘liq, oilaviy baxt-saodat, qardosh Turkmaniston xalqiga esa tinchlik-osoyishtalik va ravnaq tiladi.
Shavkat Mirziyoyev 29-iyun kuni Turkman xalqining milliy yetakchisi, Turkmaniston Xalq Maslahati Raisi Gurbanguli Berdimuhamedov bilan telefon orqali muloqot o‘tkazdi.
Suhbat avvalida davlat rahbari Gurbanguli Berdimuhamedovni tavallud kuni bilan samimiy tabriklab, unga mustahkam sog‘liq, oilaviy baxt-saodat, qardosh Turkmaniston xalqiga esa tinchlik va ravnaq tiladi. O‘z navbatida, Turkmaniston Xalq Maslahati Raisi Prezident Serdar Berdimuhamedovning samimiy salomini yetkazdi.
Muloqot chog‘ida savdo-iqtisodiy aloqalar, sanoat, energetika, transport va boshqa ustuvor yo‘nalishlardagi qo‘shma loyihalar, shuningdek, “Shovot–Toshovuz” chegaraoldi savdo zonasining samarali faoliyati alohida e’tirof etildi. Hududlararo hamkorlik, ishbilarmon doiralar va madaniy-gumanitar almashinuvlarni yanada kengaytirish masalalari ham muhokama qilindi.
Yaqinda Ashxobod shahrida bo‘lib o‘tgan Hukumatlararo komissiya va Ishbilarmonlar kengashi yig‘ilishlarining yakunlari yuksak baholandi.
Joriy yil oktabr oyida Turkmanistonda bo‘lib o‘tadigan Markaziy Osiyo va Ozarbayjon davlat rahbarlarining sakkizinchi Maslahat uchrashuviga tayyorgarlik ko‘rish doirasida mintaqaviy kun tartibini muvofiqlashtirish va ilgari surishga alohida e’tibor qaratildi.
