Surxondaryo va Andijonda elektr tizimidagi korrupsion holatlarga chek qo‘yildi
Elektr hisoblagichi va xizmat vazifasi evaziga pora olgan mansabdorlar qo‘lga olindi.
Surxondaryo va Andijon viloyatlarida elektr ta’minoti tizimida korrupsiyaga oid ikki holat fosh etildi. Bu haqda DXX Zamon.uz'ga ma'lum qildi.
Ma’lum qilinishicha, “Hududiy elektr tarmoqlari” AJ “Energosavdo” filiali Sho‘rchi tuman bo‘limi muhandisi xizmat mavqeini suiiste’mol qilib, fuqaroga tegishli savdo do‘konida elektr energiyasidan foydalanish bo‘yicha aniqlangan qoidabuzarlik yuzasidan rasmiy dalolatnomani ko‘rib chiqmaslik, ishni sudga yubormaslik hamda yangi elektr hisoblagichini o‘rnatib, ro‘yxatdan o‘tkazib berish evaziga 1 ming AQSH dollari talab qilgan.
U dastlab 200 AQSH dollari va 1 million 50 ming so‘m olgan bo‘lsa, Davlat xavfsizlik xizmatining Surxondaryo viloyati boshqarmasi xodimlari Ichki ishlar organlari hamda Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbir davomida qolgan 500 AQSH dollari va 2,4 million so‘mni olayotgan vaqtida ashyoviy dalillar bilan qo‘lga olingan.
Shuningdek, Andijon viloyatining Baliqchi tumani elektr ta’minoti korxonasi boshlig‘i o‘rinbosari xizmat mavqeidan foydalanib, korxona xodimlarining oylik faoliyat ko‘rsatkichlarini yuqori tashkilotdagi tanishlari orqali ijobiy baholatib berish evaziga pul talab qilgani aniqlangan.
Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti tomonidan o‘tkazilgan tezkor tadbirda mansabdor shaxs 300 AQSH dollarini olayotgan vaqtida ashyoviy dalillar bilan ushlangan.
Hozirda har ikki holat yuzasidan mansabdor shaxslarga nisbatan jinoyat ishlari qo‘zg‘atilib, tergov harakatlari davom ettirilmoqda.
