Prezident Shavkat Mirziyoyev davlat tashrifi bilan Gruziyaga boradi
Tbilisda Gruziya Prezidenti hamda Bosh vaziri bilan muzokaralar o‘tkazilishi rejalashtirilgan.
Shavkat Mirziyoyev Gruziya Bosh vaziri Irakliy Kobaxidzening taklifiga binoan 2–3-iyul kunlari davlat tashrifi bilan Gruziyada bo‘ladi.
Tashrif doirasida Tbilisi shahrida Gruziya Prezidenti Mixail Kavelashvili hamda Bosh vaziri Irakliy Kobaxidze bilan oliy darajadagi muzokaralar o‘tkazilishi rejalashtirilgan.
Uchrashuvlarda O‘zbekiston va Gruziya o‘rtasidagi do‘stlik hamda ko‘p qirrali hamkorlik munosabatlarini yanada rivojlantirish masalalari muhokama qilinadi. Tomonlar siyosiy muloqotni mustahkamlash, parlamentlararo va hududlararo aloqalarni kengaytirish, savdo-iqtisodiy hamkorlikni rivojlantirish hamda madaniy-gumanitar almashinuvlarni faollashtirish yuzasidan fikr almashadi.
Shuningdek, sanoat, farmatsevtika, kimyo, qishloq xo‘jaligi, turizm, energetika va axborot texnologiyalari sohalarida qo‘shma kooperatsiya loyihalarini ilgari surish masalalariga alohida e’tibor qaratiladi.
Muzokaralarda transport-logistika yo‘nalishidagi hamkorlikni kengaytirish, eksport geografiyasini rivojlantirish hamda xalqaro va mintaqaviy ahamiyatga molik dolzarb masalalar ham kun tartibidan o‘rin oladi.
Davlat tashrifi yakunida ikki mamlakat o‘rtasidagi hamkorlikning turli yo‘nalishlarini qamrab oluvchi qator ikki tomonlama hujjatlarni imzolash rejalashtirilgan.
