Gruziyada Alisher Navoiy haykali ochildi

 

Gruziyaga davlat tashrifi doirasida Shavkat Mirziyoyev hamda Gruziya Bosh vaziri Irakliy Kobakhidze Tbilisi shahrida o‘zbek xalqining buyuk shoiri va mutafakkiri Alisher Navoiy haykalining tantanali ochilish marosimida ishtirok etdi.

 

Marosimda Alisher Navoiyning boy ilmiy va adabiy merosi nafaqat o‘zbek xalqi, balki butun insoniyatning bebaho ma’naviy boyligi ekani alohida ta’kidlandi. Uning asarlari asrlar davomida insonparvarlik, ma’rifat, tafakkur va ezgulik g‘oyalarini targ‘ib etib, turli xalqlar va avlodlar uchun ilhom manbai bo‘lib kelayotgani qayd etildi.

 

Ta’kidlanganidek, Tbilisida Alisher Navoiy haykalining ochilishi O‘zbekiston va Gruziya o‘rtasidagi madaniy-gumanitar hamkorlik tarixidagi muhim voqealardan biri bo‘ldi. Ikki xalqni azaldan do‘stlik, savdo aloqalari va o‘zaro hurmat rishtalari bog‘lab kelgani, bugungi kunda esa ushbu munosabatlar yangi mazmun bilan boyib borayotgani qayd etildi.

 

Shuningdek, O‘zbekistonda buyuk gruzin shoiri Shota Rustaveli merosiga yuksak ehtirom ko‘rsatilayotgani, Toshkentdagi markaziy ko‘chalardan biri uning nomi bilan atalishi hamda haykali o‘rnatilgani eslatib o‘tildi. O‘z navbatida, o‘tgan yili Tbilisidagi markaziy bog‘lardan biriga Alisher Navoiy nomi berilgani ikki xalq o‘rtasidagi do‘stlikning yana bir yorqin ifodasi ekani ta’kidlandi.

 

So‘nggi yillarda O‘zbekiston va Gruziya o‘rtasidagi madaniy-gumanitar hamkorlik izchil rivojlanib, Tbilisida O‘zbekiston madaniyati va kinosi kunlari, Toshkentda esa Gruziya madaniyati kunlari muvaffaqiyatli tashkil etildi.

 

Marosim yakunida Tbilisida qad rostlagan Alisher Navoiy haykali O‘zbekiston va Gruziya xalqlari o‘rtasidagi mustahkamlanib borayotgan do‘stlik va strategik sheriklik munosabatlarining yorqin ramziga aylanishi ta’kidlandi.