Oʻzbekiston va Gruziya munosabatlari strategik sheriklik darajasiga koʻtarildi
Ikki mamlakat oʻrtasidagi hamkorlikni yangi bosqichga olib chiqadigan deklaratsiya va oʻndan ortiq memorandum hamda bitimlar imzolandi.
Gruziyaning Tbilisi shahrida boʻlib oʻtgan oliy darajadagi muzokaralar yakunida Shavkat Mirziyoyev hamda Gruziya Bosh vaziri Irakliy Kobakhidze Strategik sheriklik munosabatlarini oʻrnatish toʻgʻrisidagi deklaratsiyani imzoladilar.
Shuningdek, davlat rahbarlari huzurida Oʻzbekiston va Gruziya oʻrtasidagi hamkorlikni kengaytirishga qaratilgan qator ikki tomonlama hujjatlar almashildi.
Imzolangan hujjatlar bojxona sohasida hamkorlik, axborot-kommunikatsiya texnologiyalari va raqamlashtirish, kasbiy va oliy taʼlim, fan va innovatsiyalar, 2026–2027-yillarga moʻljallangan hukumatlararo hamkorlik dasturi, 2027–2030-yillarga moʻljallangan madaniy hamkorlik dasturi, iqtisodiyot va moliya, qishloq xoʻjaligi, turizm, sogʻliqni saqlash, atrof-muhitni muhofaza qilish, mehnat migratsiyasi, radiatsiyaviy himoya va yadroviy xavfsizlik kabi yoʻnalishlarni qamrab oldi.
Bundan tashqari, Oʻzbekiston Bosh prokuraturasi huzuridagi Majburiy ijro byurosi hamda Gruziya Adliya vazirligi huzuridagi Milliy ijro byurosi oʻrtasida hamkorlik toʻgʻrisidagi memorandum ham imzolandi.
