Erling Xoland dubli Braziliyani JCHdan chiqarib yubordi
Norvegiya tarixda ilk bor Jahon chempionati chorak finaliga chiqdi.
2026-yilgi FIFA Jahon chempionatining 1/8 final bosqichida Norvegiya terma jamoasi Braziliyani 2:1 hisobida mag‘lub etib, tarixda ilk bor mundial chorak finaliga chiqdi.
AQShning Sharqiy Ruterford shahridagi MetLife stadionida o‘tkazilgan uchrashuvning bosh hakami Ismoil Elfat bo‘ldi.
Bellashuvning 14-daqiqasida braziliyalik yarim himoyachi Bruno Gimaraes penaltidan foydalana olmadi. Ikkinchi bo‘limda, 67-daqiqada Neymar maydonga tushdi.
Uchrashuv taqdiri so‘nggi daqiqalarda hal bo‘ldi. Norvegiya hujumchisi Erling Xoland 79-daqiqada hisobni ochdi, 90-daqiqada esa o‘zining ikkinchi golini urib, jamoasining ustunligini mustahkamladi. Qo‘shimcha daqiqalarda Neymar penaltidan gol urgan bo‘lsa-da, bu Braziliyani mag‘lubiyatdan qutqara olmadi.
Norvegiya chorak finalda Meksika – Angliya uchrashuvi g‘olibiga qarshi maydonga tushadi. Braziliya esa musobaqani 1/8 final bosqichida tark etdi.
Qayd etilishicha, bu Norvegiyaning Jahon chempionati tarixidagi ilk chorak finalidir. Braziliya esa 1990-yildan buyon ilk bor mundialni shunchalik erta bosqichda yakunladi.
