Minskda O‘zbekiston Prezidenti rasmiy kutib olindi
Marosimdan so‘ng oliy darajadagi muzokaralar boshlandi.
Belarus poytaxti Minsk shahridagi Mustaqillik saroyida rasmiy tashrif bilan ushbu mamlakatda bo‘lib turgan O‘zbekiston Prezidenti Shavkat Mirziyoyevni tantanali kutib olish marosimi bo‘lib o‘tdi.
Marosim davomida saroy oldidagi maydonda O‘zbekiston va Belarus davlat bayroqlari ko‘tarildi hamda faxriy qorovul saf tortdi. Shavkat Mirziyoyevni Belarus Prezidenti Aleksandr Lukashenko samimiy kutib oldi.
Shundan so‘ng ikki davlatning davlat madhiyalari yangradi. Davlat rahbarlari faxriy qorovul safi oldidan o‘tib, rasmiy delegatsiyalar aʼzolarini qutladilar.
Marosim yakunida prezidentlar birgalikda suratga tushdi. Shundan so‘ng O‘zbekiston va Belarus yetakchilarining oliy darajadagi ikki tomonlama muzokaralari boshlandi.
