Shavkat Mirziyoyev Belarus Prezidentini O‘zbekistonga taklif etdi

 

Minsk shahrida Shavkat Mirziyoyev va Belarus Prezidenti Aleksandr Lukashenko tor doirada hamda rasmiy delegatsiyalar ishtirokida muzokaralar o‘tkazdi.

 

Uchrashuv avvalida davlat rahbari so‘nggi yillarda O‘zbekiston va Belarus o‘rtasidagi ko‘p qirrali hamkorlik sifat jihatidan yangi bosqichga ko‘tarilganini alohida ta’kidladi.

 

Qayd etilishicha, rasmiy tashrif arafasida Hukumatlararo komissiya va Ishbilarmonlar kengashi yig‘ilishlari, siyosiy maslahatlashuvlar, ekspertlar uchrashuvlari hamda O‘zbekiston madaniyati kunlari muvaffaqiyatli tashkil etildi.

 

Muzokaralarda ikki mamlakat o‘rtasidagi savdo-iqtisodiy aloqalar izchil rivojlanayotgani qayd etildi. So‘nggi besh yil davomida o‘zaro savdo hajmi qariyb uch barobar oshib, 2025-yil yakunlariga ko‘ra qariyb 1 milliard dollarga yetgan. Joriy yilning o‘tgan davrida esa bu ko‘rsatkich yana 30 foizga o‘sgan. Ayni paytda ikki davlat ishtirokidagi 360 ta qo‘shma korxona faoliyat yuritmoqda.

 

Tomonlar o‘zaro savdo hajmini 2 milliard dollarga yetkazish bo‘yicha kelishuvlarni olqishlab, qishloq xo‘jaligi, mashinasozlik, farmatsevtika, elektrotexnika, yengil sanoat, mebelsozlik va boshqa tarmoqlarda yangi kooperatsiya loyihalarini amalga oshirishga kelishib oldi.

 

Shuningdek, O‘zbekistonning tinch atom energetikasidan foydalanish va ushbu yo‘nalishda infratuzilmani rivojlantirish borasida Belarus tajribasini o‘rganishga qiziqish bildirildi.

 

Muzokaralarda Minsk shahrida o‘tkazilgan uchinchi O‘zbekiston–Belarus hududlararo forumi yakunlari ham yuqori baholanib, uning doirasida savdo shartnomalari va investitsiya bitimlarining salmoqli paketi imzolangani qayd etildi.

 

Prezidentlar BMT, MDH, Shanxay hamkorlik tashkiloti va Qo‘shilmaslik harakati kabi xalqaro tuzilmalar doirasidagi o‘zaro hamkorlikni davom ettirishga qatʼiy intilishlarini tasdiqladi.

 

Madaniy-gumanitar aloqalarni yanada rivojlantirish masalalari ham muhokama qilinib, joriy yil yakuniga qadar qo‘shma turizm, tibbiyot va ta’lim forumlarini o‘tkazishga kelishib olindi.

 

Uchrashuv yakunida Prezident Shavkat Mirziyoyev Belarus Prezidenti Aleksandr Lukashenkoni rasmiy tashrif bilan O‘zbekistonga kelishga taklif etdi.