ICESCO bosh direktori Salim al-Malik “Doʻstlik” ordeni bilan taqdirlandi
Joriy yilda Toshkentda ICESCO ofisi ochildi, Oʻzbekistonning 7 ta meros obyekti tashkilot roʻyxatiga kiritildi.
Shavkat Mirziyoyev Islom sivilizatsiyasi I xalqaro forumi doirasida mamlakatimizga tashrif buyurgan Islom dunyosi taʼlim, fan va madaniyat tashkiloti (ICESCO) bosh direktori Salim al-Malikni qabul qildi.
Uchrashuvda Oʻzbekiston va ICESCO oʻrtasidagi koʻp qirrali sheriklikni yanada rivojlantirish hamda hamkorlikning istiqbolli yoʻnalishlari muhokama qilindi.
Muloqot davomida xalqaro tashkilot bilan amaliy hamkorlik izchil kengayib borayotgani alohida qayd etildi. Xususan, Oʻzbekiston xalqaro islomshunoslik akademiyasida ICESCO kafedrasi faoliyat yuritmoqda, joriy yilda Toshkent shahrida tashkilotning mintaqaviy ofisi ish boshladi.
Shuningdek, joriy yil fevral oyida Islom olami madaniy merosi qoʻmitasining yigʻilishi yakunlariga koʻra, Oʻzbekistonning 7 ta moddiy va nomoddiy madaniy meros obyekti ICESCO roʻyxatiga kiritilgani mamnuniyat bilan qayd etildi.
Tomonlar madaniy yodgorliklar va noyob qoʻlyozmalarni restavratsiya qilish, muhofaza etish va raqamlashtirish, mamlakatimizning boy tarixiy-madaniy merosini xalqaro media platformalari orqali keng targʻib qilish hamda qoʻshma ilmiy va madaniy tadbirlarni tashkil etish masalalariga alohida eʼtibor qaratdilar.
Uchrashuv yakunida Shavkat Mirziyoyev xalqimizning boy madaniy merosini xalqaro miqyosda keng targʻib etishga qoʻshgan munosib hissasi uchun ICESCO bosh direktori Salim al-Malikni Oʻzbekiston Respublikasining “Doʻstlik” ordeni bilan taqdirladi.
