Shayxulislom Ollohshukur Poshshozoda “El-yurt hurmati” ordeni bilan taqdirlandi
Shavkat Mirziyoyev Kavkaz musulmonlari idorasi raisini qabul qilib, unga davlat mukofotini topshirdi.
Shavkat Mirziyoyev Islom sivilizatsiyasi I Xalqaro forumida ishtirok etish uchun mamlakatimizga tashrif buyurgan Kavkaz musulmonlari idorasi raisi, shayxulislom Ollohshukur Poshshozodani qabul qildi.
Uchrashuv avvalida davlat rahbari shayxulislom tomonidan tuhfa etilgan, O‘zbekiston va Ozarbayjon rahbarlarining ikki tomonlama hamkorligini yorituvchi “Qardoshlik va ittifoqchilikning oliy nuqtasi” kitobi uchun minnatdorlik bildirdi.
Muloqot chog‘ida millatlararo totuvlik va diniy bag‘rikenglikni mustahkamlash, yoshlarning ma’naviy tarbiyasini yuksaltirish hamda diniy-ma’rifiy hamkorlikni kengaytirish masalalari muhokama qilindi.
Tomonlar islom dinining asl insonparvarlik mohiyatini yosh avlodga zamonaviy usullar orqali yetkazish muhimligini qayd etdilar. Shu maqsadda raqamli platformalar, interaktiv ta’lim vositalari va ilmiy salohiyatni birlashtirish bo‘yicha hamkorlikni kuchaytirish taklif etildi.
Uchrashuv yakunida Shavkat Mirziyoyev shayxulislom Ollohshukur Poshshozodani musulmon dunyosida ilm-fan, ma’rifat va dinlararo totuvlikni rivojlantirishga qo‘shgan ulkan hissasi uchun O‘zbekiston Respublikasining “El-yurt hurmati” ordeni bilan taqdirladi.
