Abituriyentlar uchun kirish test sinovlari sanalari e’lon qilindi
OTMga kirish testlari 10 kun davomida ikki smenada o‘tkaziladi.
2026–2027-o‘quv yili uchun davlat oliy va kasbiy ta’lim muassasalariga kirish test sinovlari 14-iyuldan 23-iyulgacha bo‘lib o‘tadi.
Test sinovlari har kuni ikki smenada tashkil etiladi. Birinchi smena soat 08:00, ikkinchi smena esa 15:00 da boshlanadi. Abituriyentlar imtihon boshlanishidan kamida 1,5 soat oldin belgilangan hududga yetib kelishi lozim.
Test sinovlarida ishtirok etish uchun “Abituriyent ruxsatnomasi” my.uzbmb.uz portali orqali taqdim etilmoqda. Abituriyentlar ruxsatnomani yuklab olib, chop etishlari tavsiya etiladi.
Test sinovlari faqat ruxsatnomada ko‘rsatilgan hudud, sana va smenada o‘tkaziladi. Boshqa joy, kun yoki smenada imtihonda ishtirok etishga ruxsat berilmaydi.
Abituriyentlar test sinoviga pasport yoki ID-karta hamda chop etilgan ruxsatnoma bilan o‘z vaqtida kelishi shart. Pasport nusxasi yoki boshqa hujjatlar bilan kelgan, shuningdek, kechikkan abituriyentlar test sinovlariga kiritilmaydi.
