Ikki kichik sayyoraga o‘zbekistonlik olimlar nomi berildi

 

Xalqaro astronomiya jamiyatining Kichik jismlar bo‘yicha qo‘mitasi 2026-yil 9-iyul kuni e’lon qilgan rasmiy bayonotga ko‘ra, O‘zbekiston Fanlar akademiyasi Astronomiya institutining ikki nafar olimi — Kamoliddin Ergashev va Otabek Burxonov nomi ikki kichik sayyoraga (asteroidga) berildi.

 

Mazkur nomlar WGSBN Bulletin’ning 6-jild, 11-sonida e’lon qilingan. Endilikda xalqaro astronomik kataloglarda ushbu osmon jismlari (131358) Kamolergashev va (121339) Otabekburkhonov nomlari bilan qayd etiladi.

 

2001-yil 19-may kuni Chexiyaning Ondrejov observatoriyasida kashf etilgan va avval 2001 KA2 belgisi bilan ro‘yxatga olingan asteroid Astronomiya instituti katta ilmiy xodimi Kamoliddin Ergashev sharafiga nomlangan. Rasmiy izohda uning asteroidlar fotometriyasi, ravshanlik egri chiziqlarini tahlil qilish, asteroidlarning fizik xususiyatlari, shuningdek asteroid juftliklari, klasterlari va qo‘shaloq asteroid tizimlarini tadqiq etishdagi ilmiy ishlari alohida e’tirof etilgan.

 

Shuningdek, 1999-yil 13-oktabrda chexiyalik astronomlar tomonidan kashf etilgan va dastlab 1999 TO15 belgisi bilan ro‘yxatga olingan asteroid Astronomiya instituti laboratoriya mudiri Otabek Burxonov nomi bilan atalgan. Rasmiy ma’lumotda olimning optik fotometriya, asteroidlar, o‘zgaruvchan yulduzlar, gravitatsion linzalangan kvazarlar hamda Maydanak observatoriyasida gamma-chaqnashlarning keyingi optik kuzatuvlari bo‘yicha olib borgan tadqiqotlari yuqori baholangani qayd etilgan.

 

Mazkur qaror o‘zbekistonlik olimlarning astronomiya sohasidagi ilmiy izlanishlari xalqaro miqyosda e’tirof etilganining yana bir yorqin ifodasi bo‘ldi.