O‘zbekistonda jamg‘arib boriladigan pensiya tizimi o‘zgaradi

Prezident Shavkat Mirziyoyev pensiya tizimini isloh qilish bo‘yicha ishlab chiqilgan takliflar taqdimoti bilan tanishdi. Takliflar jamg‘arib boriladigan pensiya tizimini takomillashtirish, fuqarolarning pensiya jamg‘armalarini ko‘paytirish hamda pensiya hisoblash tartibini o‘zgartirishni nazarda tutadi.

 

Unga ko‘ra, oylik ish haqi 7,6 million so‘mgacha (pensiya hisoblash bazaviy miqdorining 15 baravarigacha) bo‘lgan fuqarolar ish haqining 5 foizini jamg‘arib boriladigan pensiya hisobvarag‘iga yo‘naltirsa, davlat tomonidan qo‘shimcha ravishda yana 2,5 foiz miqdorida mablag‘ ajratish taklif etilgan.

 

Shuningdek, oylik daromadi 7,6 million so‘mdan yuqori bo‘lgan fuqarolar uchun ushbu chegaradan ortiq qism bo‘yicha to‘langan ijtimoiy soliqning 1 foizini ularning jamg‘arib boriladigan pensiya hisobvaraqlariga o‘tkazish rejalashtirilmoqda.

 

Takliflar orasida pensiya hisoblashda inobatga olinadigan ish haqi davrini amaldagi 5 yildan 20 yilgacha uzaytirish hamda kam daromad olingan ayrim davrlarni hisob-kitobdan chiqarish ham bor.

 

Bundan tashqari, 2027-yildan boshlab pensiya hisoblashda inobatga olinadigan ish haqining eng yuqori chegarasini hozirgi 6 million so‘mdan 6,6 million so‘mga oshirish taklif qilinmoqda.

 

Prezident mazkur o‘zgarishlar millionlab fuqarolarning hayoti va kelajagiga daxldor ekanini ta’kidlab, har bir taklifning ijtimoiy va iqtisodiy ta’sirini puxta hisoblash, shuningdek, masalani aholi, keng jamoatchilik, ommaviy axborot vositalari hamda blogerlar ishtirokida ochiq muhokama qilish zarurligini qayd etdi.