Ona jazoni o‘taydi, bola maxsus markazda tarbiyalanadi: yangi tizim yo‘lga qo‘yiladi

 

Mahkum ayollarning 3 yoshgacha bo‘lgan farzandlarini maktabgacha ta’lim xizmatlari bilan qamrab olish va ularning parvarishi uchun zarur sharoitlar yaratish maqsadida yangi tartib joriy etiladi.

 

Bu Prezidentning 2026-yil 12-noyabrdagi “Jazoni ijro etish muassasalarida jazoni o‘tayotgan mahkuma ayollarning farzandlarini maktabgacha ta’lim xizmatlari bilan qamrab olish tizimini takomillashtirish to‘g‘risida”gi PQ–395-son qarorida belgilangan.

 

Qarorga muvofiq, 2026-yil 1-dekabrdan Ichki ishlar vazirligi tizimidagi 21-son jazoni ijro etish koloniyasi qoshidagi Bolalar uyi negizida hamda 42-son manzil-koloniyada 3 yoshgacha bo‘lgan bolalar uchun “Ona va bola markazi” maxsus davlat maktabgacha ta’lim tashkilotlari tashkil etiladi.

 

Ushbu tashkilotlarda 5 nafargacha bolani qamrab oladigan, kecha-yu kunduz faoliyat yurituvchi guruhlar yo‘lga qo‘yiladi. Bolalarning yashashi, tibbiy xizmatdan foydalanishi, yoshiga mos rivojlanishi va kamol topishi uchun zarur sharoitlar yaratiladi.

 

Shuningdek, tarbiyalanuvchilar 21-son jazoni ijro etish koloniyasi va 42-son manzil-koloniyasi tomonidan Bolalar uyi tarbiyalanuvchilari uchun qonunchilikda belgilangan me’yorlar asosida oziq-ovqat, kiyim-kechak, poyabzal va yumshoq anjomlar bilan ta’minlanadi.

 

Sog‘liqni saqlash vazirligi bolalarning o‘z vaqtida emlanishi va tibbiy ko‘rikdan o‘tkazilishini tashkil etadi.

 

Ijtimoiy himoya milliy agentligi esa har chorakda ona va bola uchun yaratilgan sharoitlarni o‘rganib, monitoring olib boradi.