Shavkat Mirziyoyev Toskana gubernatori boshchiligidagi delegatsiyani qabul qildi
Tomonlar Toskana va O‘zbekiston hududlari o‘rtasidagi hamkorlikni rivojlantirishga qaratilgan qo‘shma “yo‘l xaritasi”ni ishlab chiqishga kelishib oldi.
Prezident Shavkat Mirziyoyev 14-iyul kuni O‘zbekistonga amaliy tashrif bilan kelgan Italiyaning Toskana viloyati gubernatori Eujenio Jani boshchiligidagi delegatsiyani qabul qildi.
Uchrashuvda O‘zbekiston–Italiya strategik sherikligini, ayniqsa savdo-iqtisodiy, investitsiyaviy hamda madaniy-gumanitar yo‘nalishlarda rivojlantirish masalalari muhokama qilindi. Tomonlar hududlararo hamkorlikni kengaytirishga alohida e’tibor qaratdi.
Qayd etilishicha, joriy yil boshidan buyon ikki davlat o‘rtasidagi o‘zaro savdo hajmi 25 foizga oshgan. O‘zbekistonda metallurgiya, energetika, qishloq xo‘jaligi, kimyo sanoati va boshqa tarmoqlarda Italiyaning yetakchi kompaniyalari ishtirokidagi loyihalar amalga oshirilmoqda.
Uchrashuvda O‘zbekiston va Toskana o‘rtasidagi tarixiy va madaniy aloqalar, Buyuk ipak yo‘li davridan boshlangan hamkorlik an’analari ham alohida ta’kidlandi.
Prezident Toskana bilan to‘qimachilik, charm-poyabzal, oziq-ovqat, zargarlik sanoati, qurilish, ta’lim, madaniyat va turizm sohalaridagi hamkorlikni rivojlantirish katta salohiyatga ega ekanini qayd etdi.
Shuningdek, Toskana va Buxoro viloyati o‘rtasida yo‘lga qo‘yilgan sheriklik aloqalari yuksak baholandi.
Uchrashuv yakunida Toskana va O‘zbekiston hududlari o‘rtasidagi hamkorlikni yanada kengaytirishga qaratilgan qo‘shma “yo‘l xaritasi”ni ishlab chiqish va qabul qilish bo‘yicha kelishuvga erishildi.
